डोल्पा। बैंकिङ कसूर मुद्दामा पक्राउ परेका नेपाली कांग्रेस डोल्पाका उपसभापति पूर्ण बहादुर शाही एक लाख रुपैयाँ धरौटीमा रिहा भएका छन् ।
जिल्ला प्रहरी कार्यालय डोल्पाका अनुसार सोमबार शाहीलाई त्रिपुरासुन्दरी नगरपालिका–स्थित त्रिपुराकोटबाट पक्राउ गरिएको थियो ।
नेपाल सरकार वादी र शाही प्रतिवादी रहेको बैंकिङ कसूर मुद्दामा उच्च अदालत पाटन ले २०७९ कात्तिक ६ गते अन्तिम फैसला गर्दै उनलाई एक दिन कैद र दुई लाख ५० हजार रुपैयाँ जरिवाना सजाय सुनाएको थियो । फैसला पश्चात फरार रहेका शाहीलाई प्रहरीले पक्राउ गरेको थियो ।

जगदुल्ला गाउँपालिका–२ निवासी शाहीलाई पक्राउ पछि कैद तथा जरिवाना असुलउपरका लागि जिल्ला अदालतमा उपस्थित गराइएको थियो । अदालतले शाहीलाई सोमबार साँझ १ लाख धरौटीमा रिहा गरेको जनाएको छ ।